2Ti 1 | ASO | STEP | O'moso'mo evene' ma ingine Izesu' Kilisitoda gi'mizilizadoti' nene minevo' minevo' ngemeni dameni dalisave lo lo huko lingumu' neni' nene Izesu' Kilisito' aposolo mineline lo gilido' aposolo lolo' uve Paulo' naza

2 Timothy 1

Paulo' Luhuvo Nite' Apizo Gizaa' Gamazi Gizosa Timoteo'ni No'noho' Gamazi Gize-dine'

1 O'moso'mo evene' ma ingine Izesu' Kilisitoda gi'mizilizadoti' nene minevo' minevo' ngemeni dameni dalisave lo lo huko lingumu' neni' nene Izesu' Kilisito' aposolo mineline lo gilido' aposolo lolo' uve Paulo' naza 2 luhuvo nite' mene gei' vo'nelo' gipe'ne minanive Timoteo'ni nogize-giduve. Ne'mine ogosa meteho O'mosolati' ido' Guvetesi ve Izesu' Kilisitodati' nasahilikisi ido' mulumote ningaa' monovosi ido' hongu lo lamino minaa' monovo nesi nene lehizi-gidikesivo geito' minivoo losa noluve.

Paulo' Timoteo'nimu' Gelo O'moso Opo'ni Losa O'moso'mo Gonou' Amuzo Lehize-dine' Nene Amuzo Molo Do Otelive Lo Gala Dani' Gamazi

3 Gamene gamene holuka' neiha holise' neiha O'mosola laa' nouvongu' geikumu' ga'ne molosa'mivo mino O'moso isaa' neve laa' nouve. A'mine O'moso nene avo'nemote gelekele' i-di opo'ni laa' adi'mine ogo lu'neu' monovo lisihekovo' neivo minosa nene gelekele' o-do opo'ni laa' nouve. 4 Ido' naza hulo-gedo mala volosa nouvo veka novozo do'mozine' mamu' nene naza ha gele mino okongalo' ma ningekuvo nenita nolize naba soto' iliho losa gelaa' nouve. 5 Gaza O'mosomu' gele ele'vole' oga' naine' nene mo apa nite' amo lamineto' gele ele'vole' gehepeve nane lo gele minaa' nouve. Ee, gana' nene eleni izaho Loisi' a'mine'mine ogo O'mosomu' gele ele'vole' ogo neivosa izaho Eunike' nesi a'mine'mine ine' nenako naza gei' nene a'mine'mine ogo gele ele'vole' o nolosane losa gele mu'musi' o nouve. 6 Nemu' nene naza a'ne hite-giduvongu' O'moso'mo gonou' amuzo lehize-gedavo geita neine' nene gaza amuzo molo do otezo lo gaka noduve. 7 Ido' naza O'moso'mo gonou' amuzo gimine' nene amuzo molo do otezo noluvoni' nene a'mine O'moso'mo leme neine' lemeni dameni neve nene laza evenekumu' lovozo helo golise gelaa' lemeni dameni leme neivoba asi evene' ve'nido' ele'vole' ogo ogo molo oga' amuzo do minaa' lemeni damenisi ido' evene' lute ngemaa' lemenisi ido' lute okodelo' gizebo ele'vole' oga' amuzosi nene lehize-lede neize. 8 Nemu' nene gaza govozo helamo mino Guvetesi vemu' gamazi've nene lo soto sotokovo' ozo. Ido' a'mine Guvetesi vemu' nalato' ve lolo' ogo nouve nenikumukisi nene govozo helamozo. Asi Kilisito' gamazi laminekumu' lelitokisi soto' o-ledaa' neine' mulumo geni inite' ne'mine soto' o gemeline' nene gazasi O'moso'mo amuzo geme neine' ne'mi votigilelo' do molo ha gehe'mo vo minezo. 9 A'mine amuzo gimive O'moso ne'mo leli' elese molo-ledo do lu' izo do eita o-lidine' nene evene' monovo lamine' uningumu' nene ne'mine ine' nevoba asi olihe inite' mata' do soto' amo asi'vevo' minida vomine aza nasahili' Izesu' Kilisitongu' lehize-ledelesuve lo ei' lulolo' do lisihe' okido' e'meto ine' ve. 10 A'mine eikovo' minine' gamene gozopo' vomila plenim ine' inite' nene idi'nise a'nene Guvetesi ve Izesu' Kilisito' soto' idoti' nene mo soto' ogavo ningekune. Aza nene soto' ogosa helaa' ne'mi amuzo've nene bele helosa helo gelesamo minevo' minevo' minaa' nene mono' gamazi laminekuti' nene do soto' ogo lelebizave. 11 A'mine gamazi lamine' nene lo soto soto' oga' ilinive mineline ido' a'mine'mi aposolo mineline ido' a'mine gamazi nene apize ngemaa' anive mineline lo O'moso'mo neni' neve nene nele'mize molave. 12 Ne'mine o-nidine' ne'mo naza idise mela mulumo alumo nite' mene gehe'mo nouvoni'za naza gele mu'musi' o-daa' nouve Kilisito' monovo've nene naza ningo gele minuvodi'mo aza gono nimine' nene do nouvo aza a'mido' gizebo lamine' iline' amuzo'vesi mino gizebo lamine' ogo neivo gamene naba aloseive lo gele ele'vole' o nouvoni' nenako nemu' novozo helamo mino a'mine gono nene daa' nouve. 13 Nemu' nene gaza nenitati' gelaine' gamazi nene gamazi gihile neine' nenaze. A'mine gelaine' gamazi nene gaza a'mine'mine ogo lo-ngemeliningumu' nene avazaha've ne'mine do mino Izesu' Kilisitoda minine' monovo ezemu' gele ele'vole' ogatokisi ido' lute ngemaatokisi nene e'meto mino gono've do mino 14 leliku' omo minive O'moso'mi Sikalahuto' nene lehete o mino O'moso'mo gono lamine' gimido' nene gizebo lekeseve o minosa do minezo.

Paulo' Evene' Linge Mehe'ine Imangumukisi Ido' Onesiholo' Paulo' Lulo Do Gehe Gehe Ize-dingumukisi Gizine' Gamazi

15 Gaza mo gele nane. Asia aleve mukikisi ido' Higeloki Helemogeneki nesi nene mo mehe'ine nimi mine velepe' izikeve. 16 Ne neiha engi' zuho Onesiholo' aza nene gamene muki' lu'neu' do gehe gehe ize-nedo mino nalato' minuvongumu' nene ovozo ogavo golise gelamaa' ine' nenako nemu' nene Guvelesi ve'mo ei' Onesiholo' zuhola nene mulumo'ine ningivo lo noluve. 17 Ee, golise gelamo Loma ebeku' ogo hetelo mino nenikumu' nene amuzo molo vise' ogo ogosa ningine' ma neive. 18 Nemu' nene gamene nabala Guvelesi ve'mo gele emo mulumolo ningiliho lo noluve. Ido' Eheso numuno ebeku' nouvo aza vauve goloso elosa neni' nene hize ele' o-nedo minine' gasika mo ningo gele lamine' o nane' ma neive.